Wild Tales / 2014 / Spanish

 

     ஆறுவது சினம் என்று சொன்னாலும் , உண்மையாக ஆறக்கூடியதா சினம் !. ஆறுவதற்கு அடுத்த நொடியோ ஆண்டுகள் பலவோ எடுத்துக்கொள்ளளாம் அதன் வீரியத்தை பொருத்து . அப்படி ஆறா சினங்களின் அணிவகுப்பாக ஆறு குறும்படங்கள் . மனம் பிறழ்ந்தவனின் கோபம் , மணவாழ்க்கையில் கோபம் ,அதிகாரிகளின் அலட்சியத்தால் தனி ஒருவனுக்கு வரும் கோபம் ,highway-ல் ஆளை கொல்லும் அனாவசிய கோபம் , குற்றவாளியேயானாலும் குமைந்து வரும் கோபம் , ஆண்டுகள் பல ஆகியும் ஆறாத கோபம் என அத்தனையும் அமர்க்களம் .


     ஆரம்பம் அடித்து நொறுக்கிவிட்டார் . துரதர்ஷ்டவசமாக Old Boy- கதையை கேட்டு தொலைத்தது போல இந்த முதல் குறும்படத்தின் (Pasternak) கதையை படித்துதொலைத்துவிட்டேன் . படிக்கும்போதே அவளவு சுவாரஸ்யம் ! பார்க்கும் போதும் குறையவில்லை . தவறவே விடக்கூடாத 10 நிமிட குறும்படம் அது.

செம : மொத்தமும். குறிப்பாக முதல் மற்றும் கடைசி குறும்படங்கள்.

Trailer : https://www.youtube.com/watch?v=QUnXv6R2HI8

From Hell / 2001 / English

     வரலாற்று புனைவுகளில் புனைவுக்கும் நிதர்சனத்திற்கும் இடையேயான விகிதாச்சாரமும் அதை எப்படி பிணைப்பது என்ற கலையும் கைவரப்பெற்ற கலைஞர்களின் படைப்புகளில் நாம் கண்ணை கட்டி காட்டில் விட்ட நிலையை அடைவோம். அப்படைப்புகள் உண்மை என்ன என்று ஆராய்ச்சியில் நம்மை இறக்கிவிட்டுவிடும் . உதாரணத்திற்கு கல்கியின் பல படைப்புகளில் எந்த பாத்திரம் உண்மை எந்த பாத்திரம் புனைவு என்று விளங்க வரலாற்றை படிப்பதை தவிர வேறு வழி இருக்காது . அது போன்று உருவாக்கப்பட்டவரலாற்று புனைவு படம்.

    Jack the ripper- இந்த பெயர் மதனின் "மனிதனுக்குள் மிருகம் " மூலம் அறிமுகம் .அவனை பற்றிய விவரிப்புகள் அவன் ஒரு மாய மனிதன் என்ற தோற்றத்தை உருவாக்கியது . பின் Memories of Murder- பார்க்கும்போது jack the ripper-ன் ஞாபகங்கள் வந்து போனது . தொடர்கொலைகாரர்கள் வரிசையில் எண்ணிக்கையை வைத்து பார்த்தால் அவன் செய்த கொலைகள் குறைவே . இருந்தும் அந்த கொலைகள் நடந்த காலகட்டமும்(1888) , கொலை செய்யப்பட்ட முறையும் (ஒரு அறுவை சிகிச்சை நிபுணத்துவத்துடன் , படுகொலை என்பதற்கு சரியான விளக்கம் வேண்டுவோர் jack the ripper ன் கொலை விவரங்களை படித்தால் புரியும் ) முக்கியமாக யார் அதை செய்தார்கள் என்பது இன்று வரை தெரியாததும் அவன் பெயரை வரலாற்றில் முக்கியமான இடத்தில் வைத்திருக்கிறது . இந்த பெயர்கூட காவல்துறை புனைந்ததுதான் . இந்த கொலைகாரனின் கதையை சில பல திருப்பங்களுடன் செதுக்கி நம்மை கட்டி போடுகிறார் இயக்குனர் . படம் பார்த்த பின் உண்மை எது என்று விளங்க Prince Albert Victor, Duke of Clarence and Avondaler ன் வரலாற்றில் தொடங்கி Cleveland Street scandal வரை படிக்க வேண்டிய கட்டயத்திற்கு தள்ளிவிடுகிறார் இயக்குனர் . jack the ripper -ன் மேல் இருந்த ஆர்வத்தை காட்டிலும் படத்தில் Johnny Depp - இருக்கிறார் என்பது கூடுதல் ஈர்ப்பை ஏற்படுத்தியது .

பெயருக்காகவே பார்க்கலாம் : Johnny Depp

செம : நாணய சிதறல்களுகிடையே நா நனையும் காட்சி

Trailer : https://www.youtube.com/watch?v=pL2NizCjGxo

Talvar / 2015 / Hindi

   நாம் குழுவாக எதிர்வினை புரியும்போது அதீத உணர்ச்சிவசப்பட்டு விடுகின்றோமோ . நம் எதிர்வினைகளுக்கு எந்த அளவு வலிமை உண்டு என்பது பல நேரங்களில் நமக்கு தெரிவதில்லை . அனால் நம்மை எப்படி ஆட்டிவைப்பது என்பது ஊடகங்களுக்கு நன்றாக தெரிந்திருக்கிறது . எப்பொருள் யார் யார் வாய் கேட்பினும் -என்பதை எப்போதும் நாம் மறந்துவிடுகிறோம் .

  இந்த படம் பேசும் கொலைவழக்கு பரபரப்பாக பேசப்பட்ட ஒன்று . படம் பார்த்த பிறகும் இதில் குற்றவாளி யார் என்பது நம்மாளும் உறுதிபடுத்த முடியவில்லை . அனால் ஒன்று மட்டும் உறுதியாக தெரிகிறது இந்த வழக்கு ஏனைய வழக்குகளை போல கையாளப்படவில்லை . ஊடகங்கள் பாய்ச்சிய ஒளியால் மக்கள் கிளர்ந்தெழ அது அரசுக்கு அழுத்தம் கொடுக்க . அமைச்சகம் -புலன்விசாரணை அமைப்பு - நீதிமன்றம் என அந்த அழுத்தம் பரவுவதை கண்ணுறமுடிகிறது . எதோ விதத்தில் இவழக்கை முடித்தால் போதும் என்ற மனநிலைக்கு ஆளாகி ஒரு விதமாக வழக்கு முடித்து வைக்கப்பட்டிருக்கிறது . தண்டனை பெற்றவர்கள் நிரபராதிகளாக இருந்திருந்தால் ? என்ற கேள்வி படம் முடிந்து பலமணிநேரம் நம்மை துளைத்தெடுக்கிறது .
Talvar என்றால் நீதி தேவதை கைக்கொண்டிருக்கும் வாள் என்று சொல்கிறார்கள் . நம்மை உண்மைக்கு மிக அருகில் நிறுத்தி எல்லா சம்பவங்களையும் பார்க்கும் சாட்சியாக்குகிறார் இயக்குனர் . இவளவு நடுநிலையாக ஒரு உண்மை சம்பவத்தை கையாண்ட விதத்தில் நம்மை கவர்கிறார் .

செம : கடைசி 10 நிமிடங்கள் நடக்கும் அதிகாரிகளுக்கிடையேயான இரு தரப்பு விவாதங்கள் .

பெயருக்காகவே பார்க்கலாம் : Irfan Khan , Konkona Sen Sharma

Trailer : https://www.youtube.com/watch?v=aQNMsw8Ljjc 

Ennu Ninte Moideen / 2015 / Malayalam

சில திரைக்கதை திருப்பங்களுடன் இன்னும் சுவாரஸ்யமாக இப் படத்தை எடுத்திருக்கலாம்தான் .அதற்க்கான வாய்ப்புகள் மூல கதையில் இருந்தும் (மொய்தீன் கொலை முயற்சி , இறுதி படகு காட்சி ) இயக்குனர் அதை துச்சமென ஒதுக்கிவிட்டார் . அவரது நோக்கம் மற்றொரு வணிகப்பட உருவாக்கமாக இல்லை . காவியங்களில் படித்த காதல் கால்நுற்றாண்டுக்கு முன் நடந்திருக்கிறது .

விலை மதிப்பில்லா அந்த காதலுக்கு விலை வைக்க அவர் விரும்பவில்லை . இரண்டு அழகிய ஆத்மாக்கள் அனுபவித்த ஆழி அளவு காதலின் அனுபவத்தில் சிறு துளியேனும் பார்வையாளன் உணரவேண்டும் என்பதே அவர் நோக்கமாக இருந்திருக்கிறது . அதை அற்புதமாக செய்திருக்கிறார் .

செம : காஞ்சனாவை மாமியார் இழுத்து செல்லும் காட்சி

பேயருக்காகவே பார்க்கலாம்: Prithviraj Sukumaran Parvathy menon

Trailer :https://www.youtube.com/watch?v=hE140UITpD8

Rabies / 2010 / Israel

   

     
     
        மனித மனதில் உள்ள வன்மம் வெளிப்பட தகுந்த தருணத்திற்காக காத்திருக்கிறது . அந்த தருணம் பலருக்கு ஒரே நாளில் வாய்த்தால் ? யார் வெளிபடுத்துகிறார்கள் யார் அதை எதிர்கொள்கிறார்கள் என்று வரைமுறையே இல்லை,எய்தவரே பலியாவதும் நடக்கிறது .எந்த பாத்திரமும் குற்றவாளிகள் அல்ல அவர் அவர் பார்வையில் அவர்களுக்கான ஞாயங்கள் இருக்கிறது . இப்படி ஒரு விஷயத்தை கோர்வையாய் திரைக்கதை அமைத்த விதத்தில் இயக்குனர்கள் நின்று விளையாடுகிறார்கள் . Big Bad Wolves - பார்த்த பின் அந்த இரட்டை இயக்குனர்களின் பட பட்டியலை தேடினால் . அதற்கு முன் அவர்கள் எடுத்த ஒரே படம் என்று இந்த படம் இருந்தது . classic thriller க்கான முயற்சியை முதல் படத்திலேயே முயன்றிருக்கிறார்கள் அதில் கொஞ்சம் பிசகினாலும் - Big Bad Wolvesல் நிறைவேற்றிவிட்டார்கள் .

செம ; அந்த கன்னி வெடியும் கன்னியும்

பெயருக்காகவே பார்க்கலாம் : Lior Ashkenazi

Trailer : https://www.youtube.com/watch?v=UJMv7GzE_do 

Hard Candy / 2005 / English

 ஒரு வன்புணர்வு காட்சியோ , இரத்தம் தெறிக்கும் வன்முறை காட்சியோ,இயல்பான கலவி காட்சியோ வைப்பதற்கான அனைத்து முகாந்திரமும் கதையில் இருந்தும் அதை எதையும் தேர்ந்தெடுக்காமல் காட்சிப்படுத்திய விதத்தில் இந்த இயக்குனர் நம் மனதில் உயர்ந்து நிற்கிறார் .
படத்தின் முடிவில் 5 நடிகர்கள் பட்டியல் காட்டினாலும், உண்மையில் இருவர் மட்டுமே நடித்துள்ளனர் . மற்ற மூவரும் 2 நிமிடங்கள் மட்டுமே .90 நிமிடங்கள் இருவர் மட்டுமே .அந்த இருவரின் நடிப்பு திறமை படத்தை தாங்கி நிற்கிறது குறிப்பாக அந்த இளம்பெண் . Crime Thriller -படம் என்றால் காது கிழிய இரைச்சல் இசை இருக்கவேண்டும்,கேமரா கண்ணா பின்னா வென்று அலையவேண்டும் என்ற இலக்கணம் எல்லாம் வைத்துக்கொள்ளாமல் இருவரை மட்டும் வைத்துக்கொண்டு சுவாரஸ்யம் குறையாமல் கத்தி இன்றி இரத்தம் இன்றி மிரட்டி இருக்கிறார் . Crime Thriller -படங்களின் வரிசையில் இதன் கதை சொல்லும் விதத்தால் ஒரு முக்கியமான இடத்தை பிடிக்கிறது .

செம : அந்த அறுவை சிகிச்சை

பெயருக்காகவே பார்க்கலாம் : Ellen Page

Trailer : https://www.youtube.com/watch?v=hvx0m2SeOSk

Chungking Express /1994 / Hong Kong

   

காதலிக்க கொஞ்சம் அசட்டுதனம் வேண்டும் . இரண்டு கதைகள் இரண்டு நாயகர்களின் காதல் . .அசட்டுதனம் ஆறவே இல்லாவிடின்! அதிகமாக இருந்தால் !. இசை வழிந்தோட இயல்பாய் ஒரு காதல் படம் . காட்சிகளும் காட்சிப்படுத்திய விதத்தால் 20- ஆண்டுகளுக்கு முன் எடுத்த படம் என்பதை நம்ப மறுக்கிறது மனம்,அப்படி ஒரு உயிர்ப்போடு இருக்கிறது .சில படங்களின் OST- யை தேடிப்பிடித்து திரும்ப திரும்ப கேட்போம் அப்படிப்பட்ட இறவா இசை . Hong Kong ன் மாற்று சினிமாக்கு வழி கோலிய இயக்குனர்களில் Wong Kar-wai-ம் ஒருவர் .

செம : -கண்மூடித்தனமாக ஒரே இரவில் canned pineapple சாப்பிடுவது

பேருக்காகவே பார்க்கலாம் : Wong Kar-wai, Tony Leung Chiu Wai

Trailer : https://www.youtube.com/watch?v=Bjd7PFf_TFw

The Lunchbox /2013 / Hindi

 

திருமண உறவு தாண்டிய ஒரு ஈர்ப்பு எதுவாக இருந்தாலும் , அது இந்த சமுகத்தில் கள்ள காதலாக மட்டுமே பார்க்கடுகிறது .தினசரிகளில் படிக்கும் எல்லா கள்ள காதல்கலும் உடல் சார்ந்த ஈர்ப்பாகவே இருந்திருக்கும் என்று முடிவு செய்வது யார் ?

   திருமண உறவு தாண்டிய ஒரு ஈர்ப்பு ஏற்படுவதற்கான வாய்ப்புகள் சிலருக்கு உண்டு இது இயல்பானதே .அதை எப்படி கையாள்கிறார்கள் என்பது அவரவர் பக்குவத்தை பொருத்தது . அனால் அப்படி ஒரு ஈர்ப்பே பெருங்குற்றம் என்று சொல்வதை எப்படி எடுத்துகொள்வது . சர்ச்சையான இப்படிஒரு விஷயத்தை எடுத்துக்கொண்டு அழகிய கவிதை ஒன்றை எழுதியுள்ளனர் .பிறன் மனை நோக்கும் ஒரு பேரழகன் பற்றிய கதை .

தயாரிப்பாளர் : Anurag Kashyap நடிகர்கள் : Irfan Khan Nimrat Kaur Nawazuddin Siddiqui இந்த பெயர்களுக்காகவே படத்தை பார்க்கலாம்

செம :

• நாயகியின் தந்தை இறந்த எழவு வீட்டில் அவள் தாய் புலம்புவது .
• இறுதியில் பந்து கேட்க வரும் அந்த சிறுவர்களிடம் Irrfan Khan- பேசும் விஷயம் .

Trailer : https://www.youtube.com/watch?v=Enq9nNGnMFY 

SHAME /2011 / British

   

      உறவுகள் தவிர்த்து கலவி மட்டுமே வாழ்க்கை என்று இருக்கும் ஒரு sex addict இன் இயல்பான கதை. உறவுகள் என்றாலே சுமை என்று காதலியைக்கூட தவிர்ப்பவனின் வாழ்வில் நுழையும் ஒரு உறவு ஏற்படுத்தும் மாற்றம் . நாயகனாக நடித்திருப்பவர் பல இடங்களில் நடிப்பில் அள்ளுகிறார் (Steve Jobs படத்தில் Steve Jobs-ஆக நடிப்பவர் இவர்தான் ). இசையும் ,நடிப்பும் ,உள்ளடக்கமும் படத்தை நல்ல ஒரு நிலைக்கு எடுத்து செல்கிறது .

செம : இசை நிகழ்ச்சி முடிந்து வீடு திரும்பும் காட்சி அதன் பின் வரும் ஓட்டமும்

Trailer : https://www.youtube.com/watch?v=zyUqkoJC3pQ

The Hidden Face / 2011 / Spanish

ஆண்கள் அவர்களது அன்பை வெளிபடுத்த தெரியாதவர்கள் என்ற பொது கருத்து உண்டு . நீ என்னிடம் எவளவு அன்பு வைத்திருக்கிறாய் ? நான் உனக்கு எவளவு முக்கியம் ? இந்த கேள்விகள் எல்லா உறவுகளிலும் வந்தாலும் . ஆண் - பெண் உறவுகளில் வரும்போது சரியாக கையாளவிடில் பெரும் சிக்கல்களை சில நொடிகளில் ஏற்படுத்திவிடலாம் .ஒருத்திக்கு இந்த விஷயத்தை சோதிக்க ஒரு வாய்ப்பு கிடைக்கிறது .அது ஒரு கண்ணாமுச்சி விளையாட்டு போல விளையாட சென்றவள் விளையாடும் பொருளாகி . விசித்திரமான முடிவை நோக்கி செல்கிறாள் . அற்புதமான திரைக்கதை . Gone girl- க்கு முன் இந்த படம் வந்தாலும் எப்படி பிரபலமாகாமல் போனது என்பது விசித்திரம் .


செம - கண்ணாடிக்கு முன் நடக்கும் கலவி காட்சி .

Trailer : https://www.youtube.com/watch?v=afJ1h3Esoqo 

Big Bad Wolves / 2013 / Israle

2013-ன் சிறந்த படம் என்று Quentin tarantino- சொல்ல . உலகே திரும்பி பார்த்த படம். உண்மையாகவே சிறந்த படம், Solid Thriller - .எப்பொதும் நாம் சந்திக்கும் நபர்களை & சம்பவங்களை பற்றிய மதிப்பீடுகளை ,நாம் இதுவரை இந்த உலகதிடம் இருந்து பெற்ற தரவுகளை வைத்தே கணிக்கிறோம் . அதுபோல இந்தபடத்தில் நம் கணிக்கும் திறமையை பெரிதாக சோதிக்கிறார்கள் .சில சிறந்த கவிதைகளில் கடைசி ஒரு வார்த்தை அந்த மொத்த கவிதையின் பொருளை மாற்றக்கூடும் . அது போன்ற ஒரு அற்புதத்தை இயக்குனர் நிகழ்த்தி காட்டுகிறார் .

செம - இறுதி காட்சி

Trailer : https://www.youtube.com/watch?v=GsfzhiW5l8c

Ulidavaru Kandante / kannada / 2014

       ஒரு முழு வரைபடத்தை பல துண்டங்களாக்கி முன்னுக்கு பின் முரணாக நம்மிடம் கொடுத்தால் எப்படி இருக்கும் . முதலில் கிடைக்கும் துண்டங்களை வைத்து எதுவுமே கணிக்க முடியாது . கொஞ்சம் மண்டை காயும் .அடுத்து அடுத்து கிடைக்கும் துண்டங்களை வைத்து ஓரளவு என்ன என்று கணிக்க முடியுமே தவிற அருதிய்ட்டு சொல்ல முடியாது . இறுதி துண்டம் கிடைத்த உடன் அந்த முழு உருவம் என்னவென்று புரியும் . அந்த விடை நமக்கு முன்பே தெரிந்த விடையாக கூட இருக்கலாம் . ஆனால் அந்த துண்டங்களை சேகரித்த நேரத்தில் நமக்குள் இருந்த பரபரப்பும் ஆர்வமும் ஒரு பரவச அனுபவமாக இருக்கும் . அப்படி ஒரு அனுபவத்தை இந்த Ulidavaru Kandante - படம் தருகிறது .
செம.

1. முன்று படங்களில் நாயகனாக நடித்து விட்டு நாலாவது படம் இயக்குனராக ஒரு தனி தில் வேண்டும் அது ரக்ஷித் ஷெட்டிக்கு அதிகமா இருக்கு. ஒரு creator நம்ம கட்டி போடுறார் .
2. Cuban boy - கதை அதை வைத்த இடங்கள் எல்லாமே கவிதை

Trailer : https://www.youtube.com/watch?v=POJ_6EtGeMw 

மாசில் வீணையும் ....மணவை மார்கழியும்

   மெலிதாக காதோரம் அடிக்கும் குளிரை தடுக்க போர்வையை மேலே இழுத்தால் காலில் குளிரடிக்கும். கொஞ்சம் உடலை சுருக்கி படுத்தால் அந்த சிறு போர்வைக்குள் பொருந்தலாம் . பனியை தடுக்கும் போர்வை காற்றில் பரவும் ஒலியை தடுக்க தடுமாறும் .அடுக்களையில் அம்மாவோ, ஆத்தாளோ பாத்திரங்களை உருடிட்கொண்டிருபர். அதையும் கடந்து மெல்லிய குரலில் ஒரு ராகம் போர்வை வளையத்தை முட்டி மோதிகொண்டிருக்கும் .அந்த குரல் நிற்கும் சிறு இடைவேளையில் கஞ்சிரா ஒலி உச்சமடையும் .மார்கழி ன் 30 -நாட்களும் இது நடைமுறை.

   எழுந்து அரை தூக்கதில் இசை வரும் திசை நோக்கி சென்றால் , குளிருக்கு இதமாய் சால்வை போர்த்தி அக்கால அரிக்கேன் விளக்கும் இக்கால Torch – விளக்கு,கஞ்சிரா சகிதம் இசைத்து கொண்டிருப்பார் தாதர். ஐந்து நிமிடங்களுக்கு ஒரு வீடு என்று அழுத்தி நிறுத்த முடியாத அலாரமாக நகர்ந்துகொண்டிருப்பார் .

   அவரை தொடர்ந்து வாசல் படி தாண்டினால் மப்ளர் கட்டிய வீட்டு பெண்கள் வண்ண கோலம் வரைந்துகொண்டிருப்பர். வண்ணம் தீட்ட தெரியாத வயதென்றாலும் பெரிய பூ ஒன்றுக்கு தீட்ட சொல்லுவர். பெரிய கோலங்களாக இட வேண்டும் என்று பக்கத்துக்கு வீட்டு அக்காக்களுடன் போட்டி போட்டு கொண்டு வரைந்து விட்டு வண்ணம் தீட்ட திண்டாடி கொண்டிருப்பார் . அந்த சமயத்தில் சிக்கிய அடிமைகள் நாமாக இருப்போம் .பரங்கி பூ பகிறும்  சாக்கில் பக்கத்துக்கு அக்காக்கள் கோலங்களை நோட்டம் விட வருவர் . சாப்பிட தெரியாத குழந்தை பூசி மொழுகுவது பொல வண்ண பொடியை அள்ளி தெளித்துவிட்டு S-ஆவதில் மும்முரமாய் இருப்போம் நாம் . மெல்ல வெள்ளி முளைக்க , நீறு பூசிய உடம்புடன் சில அண்ணன்மார்கள் "மாசில் வீணையும் மாலை மதியமும்" என்று பாடிய வண்ணம் தெருவை கடந்து செல்வர் . தாதருக்கு இணையாக இவர்களும் நம்மை வசீகரிப்பர் . இவர்களை போலகவேண்டும் என்று தோன்றும்.

  அடுத்தடுத்த சில ஆண்டுகளில் அது நடந்தது . ஒரு சுப தினத்தில் முத்த அண்ணன்மார்கள் அன்புடன் படையில் சேர்த்துகொண்டனர் . ஒரே ஒரு நிபந்தனையோடு அவர்கள் பலி கேட்டது " மார்கழி மாதம் காலை தூக்கம் ".இரவே போர்வையுடன் போருக்கு போவதுபோல் யாராவது ஒருவரது வீட்டு திண்ணையில் ஐக்கியமாகி . வீண் கதை பேசி தூங்க 10-11 மணி ஆகும் . காலை 4-4.30 க்கு யாரவது எழுப்ப ,சிலரை பன்னீர் தெளித்து எழுப்பவேண்டிவரும் .மொத்தமாக மம்முசாமி கரையிலோ அல்லது சந்தை பேட்டை புள்ளையார் கோயில் கரையிலோ குளித்து . இங்கு குளித்து என்று ஒரு வரியில் சொன்னாலும் ,தண்ணீரை பதம் பார்த்து கொண்டிருக்கும் சிலரை முக்கி எடுக்க அரைமணி நேரம் ஆகும் .அந்த சிலரில் நானும் ஒருவன் என்பதை இங்கு பெருமையுடன் பதிவிடுகிறேன் .சித்தநாதன் விபூதியை உடலில்  கை எட்டும் இடம் வரை பூசி . இருக்கிற இசை கருவிகளை பங்கிட்டு ( நம்மை போன்ற புது வரவுகளுக்கு சோடா மூடி தைத்த கட்டைகள் கிடைத்தாலே பாக்கியம்) .புள்ளையாரை கும்பிட்டு மாசில் வீணையும் என்று தொடங்கினால் .....உண்மையை சொல்லப்போனால் அண்ணன்மார்களுக்கு 5-6 பாடல்கள் தெரியும் மற்றபடி நாங்கள் எல்லாரும் ஒரு support -அவளவே .அவர்கள் பாடி முடித்தவுடன் இருக்கிற இசைக்கருவிகளை இயன்றவரை அடிக்கவேண்டும் அதுவே எங்கள் பணி.

  தொடங்கிய இரண்டு நாளிலேயே  மற்ற தெருக்களில்  நாய்களின் இருப்பிடங்கள் உறுதி செய்யப்படும் . அந்த ஏரியாக்களில் படை Airplane mode-க்கு சென்றுவிடும் .சில எதிர்பாராத தருணங்களில் பக்கத்துக்கு தெருக்களின் படைகளை கடந்து செல்ல நெரிடும் அப்போது 19999 hrs decibel-ஐ தொடும் அளவுக்கு ஒலிஎழுப்பி நம் தெருவின் மானம் காக்கவேண்டிவரும் .அந்த 5 நொடிகள் இந்தியா பாகிஸ்தான் 20-20 பார்க்க கிடைக்கபெற்றவர்கள் முன் ஜென்மத்தில் புண்ணியம் செய்தவர்கள் .

  திருவாதிரையும் பொங்கலும் - இந்த காலகட்டத்தில் எதிர்கொள்ளும் இரு பெரும் நிகழ்வுகள் . 40- பக்க நோட்டுடன் உலாவருவோம் . இந்த சமையத்தில் நம்மை வம்பிழுக்கவே சில பெரியவர்கள்  " பொன்னர் மேனியனே " படுங்கடா என்று தெரியாத தேவாரத்தை கேட்பார். அது போன்ற சமயங்களில் ROCK STAR DSP- போன்று அதே வரியை திரும்ப திரும்ப 4-தடவை பாடிவிட்டு வேகமாக இசைக்கருவிகளை அடித்துவிட்டு ஓடிவிடுவோம் . சில அத்தைமார்கள் என்னடா இன்னைக்கு எங்க வீடுகிட்ட பாடலியே என்று அலுத்துக்கொண்டு (என்றாவது  நல்ல மழை நாளில் எல்லாரும் தூங்கி தேவாரமே பாடாமல் இருந்திருப்போம் )அரிசியும் சில்லறை  காசுகளும் தருவர் .அந்த 40- நோட்டு நாலு பக்கம் நிரம்பினாலே பெரும் சாதனை . ஒரு வழியாக கிடைத்ததை வைத்து அபிஷேக பொருட்கள் ஏற்பாடு செய்து யார் வீட்டிலாவது பிரசாதம் செய்து . பொங்கல் அன்றோடு தேவாரம் நிறைவு செய்யப்படும் . மதியம் பொங்கல் உண்டு உறங்கும் வேளையில் நாளை காலை எழ வேண்டாம் என்ற சந்தோஷம் இருந்தாலும் . ஒரு இனம் புரியாத இழப்பு உணரமுடியும் .

  இந்த தேவாரம் பாடும் பழக்கம் எப்படி எங்கள் கிராமத்திற்கு  வந்தது, யார் இதை தொடங்கிருப்பர்  என்ற தகவல் ஏதும் இல்லை . இது ஒரு அற்புதமான கலாசார நிகழ்வு என்பது மட்டும் மறுக்க முடியாத உண்மை.தேவார பொருளோ ,மகிமையோ புரியாத வயதென்றாலும் . மார்கழி மாதம் காலையில் எழுதல்,குழுவாக செயல்படுதல் ,சிறிய அளவே இருப்பினும் பணத்தை கையாளுதல் போன்ற பெரும் விஷயங்களுக்கான விதையே அங்கே விதைக்கபடுகிறது  .  அந்த நிகழ்வு  ஒரு ஒலிம்பிக் விளக்கு போல ,தொடர் ஓட்டத்தின் மரத்துண்டு போல சில காலம் மட்டும் நம் கையில் இருந்து அடுத்த தலைமுறைக்கு கை மாற்றபடுகிறது . அந்த விளக்கு அணையாமல் இருக்கிறதா என்பது மட்டுமே நாம் உறுதி செய்து கொள்ளவேண்டிய விஷயம் . இன்றும் என்றும்.