காத்திருக்கும்   நித்யர்கள்


மின் கம்பியில் அமர்ந்திருக்கும்
காக்கை வரிசையின் நேர்த்தி
"ஹிட்ச்காக்கை" நினைவில் நிறுத்துகிறது .
இரவு நேர ரோட்டோரக் கடையின்
 நூடுல்ஸ் நூற்பில் வழியும் ஆவி
"வாங் கர் வய்"யை கண்முன்னே காட்டுகிறது .
தண்ணீரில் தத்தித்தாவும் தவளையின்
நீர் வட்ட அலையில் "கிம் கி டுக்" விரிகிறார் .
எதிர் பாராமல் எதிர்ப்படும் கறுப்பழகியின்
கண்களின் ஒளியில் "பாலுமகேந்திரா" ஒளிர்கிறார் .
பெருந்திரையின் ஒளியுமிழ்வு ஒடுங்கிய பின்னும்,
ஒழிந்துவிடுவதில்லை காலத்தை வென்ற நித்யர்கள்.
விழித்திரையின் சல்லிவேர்கள் முடியும் மூளையின் தரவடுக்குகளில் தவழ்ந்துகொண்டிருக்கிறார்கள் .
அவர்களின் ஒரு காட்சி போதுமானதாக இருக்கிறது!
அவர்களை நம்முள் மீட்டெடுக்க .
அன்று காட்சிக்காக காத்துதிருந்த கர்த்தாக்கள் ,
இன்றும் காட்சிக்காக காத்துக்கொண்டிருக்கிறார்கள்.
நம் மூளையின் மூலையில்